Venezuelako lurrikarak eragindako hondamendi humanitarioa dela-eta komunikazioa bereziki garrantzitsua den une honetan, Euskaltelek, Euskadiko eta Nafarroako telekomunikazio-operadore liderrak, aparteko neurri batzuk jarri ditu martxan erabiltzaileei Karibeko herrialdearekin konektatuta egoten laguntzeko.
Zehazki, euskal konpainiak aukera emango die kontratupeko bezeroei Euskadi eta Nafarroatik Venezuelara mugikorretik doan deitzeko eta SMSak doan bidaltzeko.
Azken orduetako mugimendu sismikoen ondorioz egoera bereziki zaila dela kontuan izanda, senide, lagun eta gertukoekin errazago komunikatzea da helburua.
Era berean, Euskaltelek doan eskainiko die roaminga —bai ahotsa eta bai datuak— une honetan Venezuelan dauden bezeroei, nahi adina komunikatzeko eta etxekoekin hitz egiteko erraztasunak emateko.
Telefono bidezko komunikazioko neurri berezi horiek etxeko bezeroei nahiz enpresa bezeroei aplikatuko zaizkie, eta datozen 15 egunetan egongo dira aktibo (baliteke epea luzatzea larrialdi humanitarioaren bilakaeraren eta irismenaren arabera).
Modu horretan, Euskaltelek bere elkartasuna eta babesa adierazi nahi dizkio Venezuelako herriari une zail hauetan, eta, aldi berean, egoera egonkortzeko eta normaltasuna lehenbailehen berrezartzeko nahia azaldu.
Dei, SMS eta roamingari buruzko informazioa
Kontsumo arduratsuaren muga: 1.000 minutu eta 300 SMS ziklo bakoitzeko.
Venezuelatik roaminga baliatzen duten bezeroentzat doakoa izango da zerbitzua erabilera pertsonalerako, betiere zentzuz erabiliz gero (espresuki geratzen dira zerbitzutik kanpo datu-kontsumo handia eragiten duten zerbitzuak, hala nola streaminga).
Argazkia: Hanna Busing