Udazkenerako plan gastronomiko ederra proposatzen dizugu: Tolosako babarrunak. Euskal Herrian dugun koilara-plater ezagunenetako bat da, etxean, elkarte gastronomikoetan edo jatetxeetan behar bezala prestatzen eta dastatzen dugun horietakoa. Hemen duzue Tolosako babarrunen errezeta, elaborazioa eta aurkezteko tankera.
Tolosako babarruna Tolosaldean landatzen den babarrun-mota bat da. Iluna da, distiratsua eta azal finekoa, eta zapore bikaina du.
Post honetan, Tolosako babarrun goxoak prestatzeko gakoak emango dizkizugu.
Gogoan hartu errezeta. Hasteko, beharrezko osagaiak bilduko ditugu.
Tolosako babarrunak prestatzeko osagaiak
Ezinbesteko osagaiak gutxi dira. Hemen ez dugu osagarririk sartu, aukerakoak direlako eta aldatu egiten direlako; aurrerago hitz egingo dugu horiei buruz.
Bi pertsonarentzako, hau behar dugu:
- Tolosako babarrunak: 250 gramo
- Tipula erdia
- Oliba olioa: 2-3 koilarakada
- Ura: 0,75 litro
Horiekin, prest gaude Tolosako babarrunen errezeta egiteko.
Tolosako babarrunen errezeta tradizionala
Tolosako babarrunak prestatzeko, lehenik eta behin kazola on bat behar duzu.
Gehitu ur hotza, oliba-olioa eta fin-fin xehatutako tipula, eta jarri sutan.
Irakiten hasten denean, jaitsi sua eta gehitu babarrunak.
Adituen gomendioa da hasierako ura bakarrik erabiltzea, hau da, babarrunen gainetik 4 hatz gailentzen den ura, kozinatu bitartean gehiago gehitu gabe.
Gutxi gorabehera, 3 orduz egosi behar dira. Babarrunak zenbat eta freskoagoak izan, orduan eta denbora gutxiago beharko dute.
Itsatsi ez daitezen, ez mugitu koilararekin, hautsi egingo baitira; hobe da kazola mugitzea, zirkuluak eginez.
Sutatik erretiratu aurretik, bota gatza.
Zerbitzatu aurretik, tarte batez su motelean uztea gomendatzen dizugu. Horrela, salda zaporetsuagoa eta lodiagoa lortuko duzu, modu guztiz naturalean.
Tolosako babarrunak eltze lasterrarekin prestatzea
Babarrunak azkarrago egiteko, bezperan beratzen jar ditzakezu —baina ez da ezinbestekoa, ezta ohikoa ere, oso finak direlako— edo eltze lasterra erabil dezakezu.
Horrela, egosketa ordu erdira murriztuko da gutxi gorabehera, eltze-motaren arabera.
Gainerakoan, jarraitu errezeta tradizionalaren urrats berberei, eta primeran geratuko zaizkizu.
Mahaira eramatea baino ez da falta.
Tolosako babarrunak sakramentuekin
Tolosako babarrunak prestatu diren kazola berean eraman ohi dira mahaira.
Baina, maiz, ez dira hutsik zerbitzatzen… Tolosako babarrunentzako osagarriak nahi dituzu?
Aukera asko dituzu horretarako. Ohikoenak txerrikia, saiheskia, barazki-odolkia eta Ibarrako piperrak dira.
Horien guztien artean, sakramentuak dira osagarri nagusia.
Hori bai, errezeta tradizionalaren arabera, sakramentuak eta babarrunak bereizita kozinatu eta zerbitzatu behar dira, nahastu gabe, batzuek eta besteek zapore osoa gordetzeko.
Nolakoak dira Tolosako babarrunak?
Tolosako babarrunen ezaugarri berezkoena kolorea (more ilun distiratsua, ia beltza) eta azal fina dira. Baita forma obalatua ere, eta ukitzean leunak direla.
Udaberrian ereiten dira, maiatzaren erdialdetik aurrera, eguraldia epeltzen hasten denean, eta urrian biltzen dira, neguko hotza iritsi aurretik.
Tolosako Babarruna landare igokaria da, eta fruitua eskuz biltzen da, artisau-prozesu bati jarraituta, ernetzen denetik mahaira iritsi arte zainduz eta mimatuz.
Gordinik edo kozinatuta saltzen dira, 0,5 kg eta 3 kg arteko unitateetan ontziratuta.
Horietan guztietan Kalitatea Fundazioak emandako Eusko Label ikurra agertzen da, produktuaren kalitatea eta jatorria ziurtatzen dituena.
Izan ere, Tolosako babarrunen ekoizleek badakite balio handia dutela, eta produktuaren komertzializazioa zaindu eta haren zabalpena egiten dute.
Tolosako Babarrunaren Festa
Bertako babarrunak sustatzeko, Tolosan festa handi bat antolatzen da astebetez, babarruna ardatz hartuta.
Ekoizleek urteko babarrunik onenak aukeratzen dituzte, eta huraxe izaten da, baita ere, Gure Kaiola elkarteak antolatutako babarrun-lehiaketa ezagunaren protagonista.
Jakina, Tolosako Babarrunaren Festan babarrun-jan herrikoi handia antolatzen da.
Hori guztia bertako produkturik ospetsuena, Tolosako babarruna, omentzeko eta aldarrikatzeko. Izan ere, gure gastronomiako errezeta tradizional eta ezagun baten protagonista da babarruna. Orain badakizu nola prestatu
Goiburuko irudia: Tolosako turismoa