Jaiak Gasteizen 2024an: Zeledon, musika, jaialdiak...

Pentsatu duzu inoiz zenbat jai izaten ditugun Gasteizen urtean zehar? Ezin ditugu guztiak azaldu edo aipatu ere, baina post honetan garrantzitsuenak jaso ditugu.

Izan ere, hor ditugu inauteriak, erromeriak, zaindarien jaiak, jaialdiak, kirol-hitzorduak eta baita zozketak ere: kultura- eta jai-jarduerak etengabeak dira Arabako hiriburuan. Hartu gogoan zein diren Gasteizko jaiak 2024an.

• San Anton eguneko zozketa: 2024ko urtarrilaren 17a

• Gasteizko inauteriak: 2024ko otsailaren 6tik 13ra

• San Prudentzio: 2024ko apirilaren 29a

• Araba Euskaraz: 2024ko ekainaren 16a

• Gasteizko Jazzaldia: 2024ko uztailaren 15etik 20ra

• Blusaren eta Neskaren Eguna Gasteizen: 2024ko uztailaren 25a

• Gasteizko Andre Maria Zuriaren jaiak: 2024ko abuztuaren 4tik 9ra

• Olarizuko erromeria: 2024ko irailaren 9a

• Gasteizko Nazioarteko Antzerki Jaialdia: 2024ko urria eta azaroa

• Komedialdia: 2024ko urriaren 22tik 27ra

• Olentzero eta Mari Domingi Gasteizen: 2024ko abenduaren 24a

• San Silvestre: 2024ko abenduaren 31a

2024ko San Anton eguneko zozketa: urtarrilak 17

Urtarrilaren 17an, San Anton abadearen egunean, udaletxeko udalbatza-aretoan, 18:00etan, San Anton eguneko zozketa ospetsua egiten da.

Tradizioaren jatorria 1781. urtekoa da. Garai hartan, hiriko ostatuak eta San Prudentzio egoitzak urtean behin zozketa berezi bat egiten zuten, eta irabazleak txerri bat irabazten zuen.

Aldi berean, San Anton Txikia ospatzen da Plaza Berrian. Txikien kasuan, saria txokolatezko bi txerri dira, eta jaia haurrentzako jokoekin, zezensuzkoarekin eta musika-emanaldiekin biribiltzen da.

2024ko Gasteizko inauteriak: otsailak 6-13

Gasteizko inauterietan, konpartsen desfileak (2024ko edizioan 25ek hartu dute parte), berbenen musikak eta abesbatza eta dantzarien emanaldiak herria girotzen dute, besteak beste.

Kolorez eta giroz betetako astea hileta-martxa batekin bukatzen da. Malkoz estalitako negarti eta hiletariek Sardinaren Erretze tradizionalarekin emango diote amaiera.

2024ko San Prudentzio: apirilak 29

Lehenik eta behin, eguna argitu behar dugu. San Prudentzio apirilaren 28an da, baina 2024an igandea denez, hilaren 29ra aldatu da eta, gainera, jaiegun bihurtu da. Bestalde, jaiak pixka bat luzatzen dituzte, eta egun pare bat lehenago eta geroago ere ekitaldiak izaten dira.

Zehazki, San Prudentzio egunaren bezperan bi hitzordu nagusi daude: Erretreta eta Danborrada. Egun handian, Armentiako zelaietara lekualdatzen da festa; eta maiatzaren lehenean, Estibalizko Andre Maria ospatzen den egunean, erromerian joaten da Estibalizko santutegiraino.

Laburbilduz, gasteiztarrek hainbat egunetan zehar gozatzen dituzte antzerkia, piroteknia-ikuskizunak, dantzaldiak, kalejirak, lehiaketa gastronomikoak eta, nola ez, Arabako patroiaren ohoreko tradizioak. Hemen duzu San Prudentziori buruzko informazio gehiago.

2024ko Araba Euskaraz: ekainak 16

Arabako ikastolek ekainaren 16an egiten dute euren jai nagusia, Araba Euskaraz.

Gure hizkuntzaren aldeko plan dibertigarri honetan kontzertuak, kalejirak, artisau-azoka, pilota-txapelketak, kalejirak eta haurrentzako jarduera ugari izango dituzu. Eta protagonismo berezia izango dute euskal dantzek.

Hitzordua Gasteizko Olarizuko zelaietan izango da.

2024ko Gasteizko Jazzaldia: uztailaren 15etik 20ra

Gasteiz munduko jazzaren hiriburu bihurtzen da uztailean.

Lau hamarkada baino gehiagoko historia du jada "Gasteizko Jazzaldiak", eta nazioarteko jazz-munduko izen garrantzitsuenak biltzen ditu. Kontzertuak, batez ere Mendizorrotzako kiroldegian eta Principal Antzokian izaten dira.

2024an, besteak beste, Chucho Valdés eta Pablo Martín Camineroren emanaldiak izango direla badakigu, eta ahots femeninoek protagonismo handiagoa izango dute: Cécile McLorin Salvant eta Terri Lyne Carrington artistak bertaratuko dira.

Blusaren eta Neskaren Eguna Gasteizen uztailak 25

Zaindariaren jaien aurrerapen gisa, Gasteizek Blusaren eta Neskaren Eguna ospatuko du uztailaren 25ean.

Egun horretan, gasteiztarrak blusa ilunez, abarkaz eta lepoko zapiaz janzten dira hilerria bisitatu eta lore-eskaintza egiteko, zezen-plazarako bidean kaleak zeharkatu aurretik.

Egun horri "Baratxuriaren Eguna" ere esaten zaio, San Frantzisko kaleko saltokietara joatea ohitura baita, txirikordaren bat erosi eta lepoan eramateko.

Gasteizko 2024ko Andre Maria Zuriaren jaiak: abuztuaren 4tik 9ra

Kontzertuak, dantzaldiak, umorea, antzerkia, folklorea, konpartsak, barrakak, su artifizialak, azoka gastronomikoak eta azoka arabiar bat ere ikusteko aukera izango dugu Gasteizko Andre Maria Zuriaren jaietan.

Hiriburuko zaindariaren jaiak dira, eta hirian bisitari ugari biltzen dira. Jai hauetan, bi gonbidatu berezi izaten dira: Zeledonek, aterki banaezinarekin, Andre Maria Zuriaren plazako zerua zeharkatuko du abuztuaren 4an, jaiei hasiera emateko. Eta Gargantua, 4,30 metroko erraldoia, Erraldoi eta Buruhandien desfile ezagunaren buru joango da.

2024ko Olarizuko erromeria: irailak 9

Olarizuko zelaietako herri-erromeriak Gasteizko udako jai-egutegiari amaiera ematen dio. Beti ospatzen da Andre Mariaren jaiotzaren hurrengo astelehenean (irailaren 8an).

Egun horretan ez dira falta Gasteizko udalerria zedarritzen duten mugarrietara bisitak. Ohitura hori duela 500 urtetik mantentzen da.

Horrez gain, babarrun-jana, haur-jolasak, kirol-txapelketak, euskal dantzak eta txistularien musika, trikitiak, gaiteroak eta danborrak ere badaude.

2024ko Gasteizko Nazioarteko Antzerki Jaialdia: urria eta azaroa

Gasteizko Nazioarteko Antzerki Jaialdiak estatuko eta nazioarteko antzerki-erakustaldi mordoa biltzen du edizio bakoitzean.

Hitzordu irmoa da, lau hamarkada egin ditu jada. Genero guztietarako lekua dago, antzerki klasikotik hasi eta abangoardiaraino, eta ekoizpen handiak tokiko konpainien parte-hartzearekin uztartzen dira.

2024ko Komedialdia: urriak 22-27

Urrian, Komedialdia Gasteizko umore-jaialdian, barrez lehertuko gara.

2024an, umorearen koloreei buruzkoa da, eta " Umore eta kolore" du leloa.

Komedialdia 2024ko egitarauan hainbat emanaldi izango dira, hala nola "Las Fellini" eta Andoni Agirregomezkortaren "Un vasco de la hostia" ikuskizuna, eta "Crayón, tras los pasos de un dibujante vitoriano oculto" erakusketa.

Olentzero eta Mari Domingi Gasteizen: abenduak 24

Olentzero eta Mari Domingi abenduaren 24an goizean goiz jaikiko dira Gasteizko udaletxean txikiekin elkartzeko.

Arratsaldean, desfilea egingo dute, eta eguna amaitzeko, Done Mikeleko balkoitik agurra egingo dute... gaua hiri osoan igaro aurretik opariak banatzen.

2024ko San Silvestre: abenduak 31

Urteko azken eguneko arratsaldean, 4.000 pertsona baino gehiago, helduak eta txikiak, Gasteizko kaleetan zehar ibiltzen dira korrika Gasteizko San Silvestre lasterketan.

Nahi baduzu, egun batzuk lehenago, abenduaren 15ean, igandea, Gasteizko Maratoi Erdia egingo da (21,097 kilometroko distantziako proba), Arabako Atletismo Federazioak antolatua.

Ez dugu nahi zuk Gasteizko jai-, kultura-, musika- eta kirol-egutegi beteko ezer galtzerik; beraz, ez galdu Euskaltelen blog hau ;)

Goiburuko irudiaren iturria: Gasteizko Udala.